अमरसिंह पंडित यांची भावनिक पोस्ट: आपल्या कानी कोणी काय घातले हे मला माहित नाही ! श्रध्देय साहेब, राजकारणाच्या पलिकडे जावून पवार परिवाराशी शिवछत्र परिवाराचा स्नेहबंध, तो भविष्यातही जपणार !!
संभाजीनगर लाईव्ह, दि. १९ – राष्ट्रवादी कॉंग्रेसमधील उभ्या फुटीनंतर ज्येष्ठ नेते तथा राष्ट्रीय अध्यक्ष शरद पवार यांनी येवल्यानंतर बीडमध्ये जाहीर सभा घेऊन जोरदार शक्तीप्रदर्शन केले. कालच्या सभेला प्रचंड प्रतिसाद मिळाला. राष्ट्रवादीतील फुटीवर बोलण्याचे टाळून शरद पवारांनी राष्ट्रीय पातळीवरील मुद्यांना हात घालत भाजपावर हल्ला चढवला. अजित पवार व स्थानिक नेत्यांचा नमोल्लेख टाळून ज्यांनी तुम्हाला घडवलं त्यांच्याबद्दल थोडी माणूसकी दाखवा असा सल्लाही पवारांनी दिला होता. यावर राजकीय गोटातून अनेक प्रतिक्रिया आल्या. दरम्यान, माजी आमदार अमरसिंह पंडित यांनी शरद पवार यांच्यावर भावनिक पोस्ट सोशल मीडियावर शेअर केली. आपल्या कानी कोणी काय घातले हे मला माहित नाही ! श्रध्देय साहेब, राजकारणाच्या पलिकडे जावून पवार परिवाराशी शिवछत्र परिवाराचा स्नेहबंध, तो भविष्यातही जपणार असे पंडितांनी नमूद केले.
अमरसिंह पंडित यांनी म्हटले आहे की,
श्रध्देय साहेब,
काल, आज आणि भविष्यातही तुमच्याबद्दल श्रध्दा आणि आदर कायम राहील. कालच्या सभेत आपण माझ्या तोंडी घातलेल्या वाक्याबाबत मी स्वप्नातही तसा विचार करू शकत नाही. आपल्या कानी कोणी काय घातले हे मला माहित नाही, त्याविषयी जाणून घेण्यात स्वारस्यही नाही मात्र हे अत्यंत क्लेषदायक आहे, एवढेच सांगतो.
आम्हा भावंडांवर शिवाजीराव पंडित यांचे संस्कार आहेत, त्यामुळे केवळ तुमचे वय झाले म्हणून नेतृत्व बदल केला असे तोडके विचार आमच्या मनी येणार नाहीत. याबद्दल सार्वजनिक ठिकाणी सोडा परंतु वैयक्तिक सुध्दा कोणाला बोललेलो नाही. तुम्हाला शंभर वर्षे निरामय आयुष्य लाभो हीच सदैव भवानी चरणी प्रार्थना आहे. तुमच्या सोबत अनेक वर्षे निष्ठेने काम करताना अनेक संधी आणि प्रलोभने मिळाली मात्र त्यावेळी कधीही डगमगलो नाही, तुमची साथ सोडली नाही. राजकारणाच्या पलिकडे जावून पवार परिवाराशी शिवछत्र परिवाराचा स्नेहबंध, तो भविष्यातही जपणार आहे.
तुम्ही आणि अजितदादा वेगळे व्हावेत हेच मुळात पटत नाही… असो, राजकीय निर्णय घेताना वैयक्तिक लाभाचा विचार कधीच मनाला शिवला नाही, लाभापायी काही निर्णय घेणार नाही याची खात्री तर तुम्हालाही असेल. बाकी माणुसकी वगैरे जपणारच कारण तुमचेच राजकीय संस्कार आहेत.
– अमरसिंह पंडित
- गुगल अ‍ॅप इंन्स्टॉल करा अन् राहा अपडेट👇
https://play.google.com/store/apps/details?id=com.sambhajinagarlive.news - WhatsApp ग्रुप 👇
https://chat.whatsapp.com/D1vs2HoW4eqFRkoSoO98Om - फेसबुक पेज👇
https://www.facebook.com/profile.php?id=100063797745685&mibextid=ZbWKwL - Telegram channel 👇
https://t.me/+YKOHk5GZrKVW8VPP - Follow the छत्रपती संभाजीनगर Live channel on WhatsApp:👇
https://whatsapp.com/channel/0029Va9cQwH1HspwZDjxdY29 - पुढील मोबाईल नंबर आपल्या WhatsApp ग्रुपमध्ये अॅड करा अन् मिळवा अपडेट
9923355999
