महावितरणचे मुख्य अभियंता सचिन तालेवार यांची मध्य प्रदेश पश्चिम क्षेत्र विद्युत वितरण कंपनीच्या संचालकपदी निवड
संभाजीनगर लाईव्ह, दि. २२ : महावितरणच्या छत्रपती संभाजीनगर परिमंडलाचे मुख्य अभियंता सचिन तालेवार यांची मध्य प्रदेश शासनाने मध्य प्रदेश पश्चिम क्षेत्र विद्युत वितरण कंपनीच्या संचालक (तांत्रिक) या पदी निवड झाली आहे. मंगळवारी इंदूर येथे ते पदभार स्वीकारणार आहेत.
मूळचे नागपूर जिल्ह्यातील सचिन तालेवार यांचे शालेय शिक्षण छिंदवाडा (मध्य प्रदेश) येथे झाले आहे. त्यांनी विद्युत अभियांत्रिकी पदवी संपादन केली आहे. तसेच गुरुग्राम येथील (MDI) मॅनेजमेंट डेव्हलपमेंट इन्स्टिट्यूटमधून एनर्जी मॅनेजमेंटमध्ये पोस्ट ग्रॅज्युएशन डिप्लोमा इन बिझनेस मॅनेजमेंटचा अभ्यासक्रम 2007-08 मध्ये पूर्ण केला आहे.
विशेष म्हणजे महावितरणकडून त्यांची या अभ्यासक्रमासाठी निवड करण्यात आली होती. तालेवार हे 1997 मध्ये तत्कालिन विद्युत मंडळात कनिष्ठ अभियंता म्हणून एचव्हीडीसी 500 केव्ही अतिउच्चदाब उपकेंद्र चंद्रपूर येथे रुजू झाले. याच ठिकाणी पदोन्नतीनंतर सहाय्यक अभियंता म्हणून त्यांनी काम पाहिले. त्यानंतर सरळसेवा भरतीमध्ये श्री. तालेवार यांची 2006 ला कार्यकारी अभियंता म्हणून निवड झाली.
या पदावर त्यांनी वर्धा, नागपूर व जालना येथे काम केले आहे. 2016 मध्ये सरळसेवा भरतीत त्यांची अधीक्षक अभियंतापदी निवड झाली. लातूर येथे या पदावर त्यांनी काम केले. 2018 च्या सरळसेवा भरतीत तालेवार यांची मुख्य अभियंतापदी निवड झाली. पुणे परिमंडलाचे मुख्य अभियंता म्हणून त्यांनी नोव्हेंबर-2022 पर्यंत तर छत्रपती संभाजीनगर परिमंडलाचे मुख्य अभियंता म्हणून डिसेंबर-2022 ते मे-2023 पर्यंत त्यांनी यशस्वीरीत्या काम केले.
- गुगल ॲप
https://bit.ly/3RaPEOb - व्हॉट्सॲप ग्रुप
https://bit.ly/4dUMnMR - व्हॉट्सॲप चॅनेल
https://bit.ly/3V1gLwq - फेसबुक पेज
https://bit.ly/451xGU8 - टेलिग्राम
https://bit.ly/3wVCVbe
