राजकारण
Trending

दिल्ली सरकारविरोधात आणलेल्या विधेयकाला राष्ट्रवादीचे खासदार संसदेत विरोध करतील; शरद पवारांचे अरविंद केजरीवालांना आश्वासन !

लोकशाही वाचवण्यासाठी राष्ट्रवादी काँग्रेसचे अध्यक्ष शरद पवारांनी पाठिंबा देण्याचे दिल्लीचे मुख्यमंत्री अरविंद केजरीवाल यांनी केले आवाहन

Photo of सुधीर जगदाळे सुधीर जगदाळे Send an email May 25, 2023

मुंबई दि. २५ मे – ‘आप’ चे प्रमुख आणि दिल्लीचे मुख्यमंत्री अरविंद केजरीवाल यांनी आज राष्ट्रवादी काँग्रेसचे अध्यक्ष शरद पवार यांची भेट घेऊन लोकशाही वाचवण्यासाठी आणि संसदेत दिल्ली सरकारविरोधात आणलेल्या विधेयकाला विरोध करण्यासाठी पाठिंबा देण्याची विनंती केली अशी माहिती राष्ट्रवादी काँग्रेसचे राज्य मुख्य प्रवक्ते महेश तपासे यांनी दिली.

यावेळी अरविंद केजरीवाल यांनी केंद्रातील भाजप सरकार आमदारांच्या घोडे बाजारकरून ईडी आणि सीबीआयसारख्या केंद्रीय एजन्सींचा वापर करून भय निर्माण करण्यासाठी आणि लोकप्रिय सरकारच्या विरोधात अध्यादेश जारी करून गैरभाजप सरकार पाडण्यासाठी अन्यायकारक मार्ग वापरत असल्याचे सांगितले. दिल्लीत कायदेशीररीत्या निवडून आलेल्या आप सरकारचे अधिकार मर्यादित करण्यासाठी, प्रधानमंत्री नरेंद्र मोदींच्या नेतृत्वाखालील केंद्रसरकारने राष्ट्रीय राजधानी प्रदेश दिल्ली दुरुस्ती विधेयक २०२३ अंमलात आणले आणि त्या प्रभावाखाली एक अध्यादेश जारी केला आहे.

केजरीवाल यांनी शरद पवार हे देशातील सर्वात वरीष्ठ नेत्यांपैकी एक आहेत आणि त्यांनी संसदेत या विधेयकाला विरोध करण्यासाठी विरोधी पक्ष आणि इतर गैरभाजप पक्षांशी बोलले पाहिजे असे मत व्यक्त केले.

यावेळी शरद पवार यांनी दिल्लीतील आप सरकारला राष्ट्रवादी काँग्रेस पक्षाचा पूर्ण पाठिंबा जाहीर केला आहे. असे अध्यादेश आणणे म्हणजे देशातील संसदीय लोकशाही मर्यादित करण्याचा प्रयत्न असल्याचा आरोप शरद पवार यांनी यावेळी केला. राष्ट्रवादीचे खासदार या विधेयकाला संसदेत विरोध करतील असे आश्वासनही शरद पवार यांनी दिल्लीचे मुख्यमंत्री अरविंद केजरीवाल यांना यावेळी दिले.

५६ वर्षांच्या संसदीय जीवनात निवडून आलेल्या सरकारवर असा निर्लज्ज हल्ला कधीच पाहिला नाही. लोकशाही वाचवण्यासाठी सर्वांनी एकत्र येणे ही काळाची गरज असल्याचे स्पष्ट मत आदरणीय शरद पवार यांनी मांडले अशी माहितीही महेश तपासे यांनी दिली.

दिल्लीचे मुख्यमंत्री अरविंद केजरीवाल, पंजाबचे मुख्यमंत्री भगवंतसिंग मान यांचा समावेश असलेल्या ‘आप’ च्या शिष्टमंडळाचे स्वागत राष्ट्रवादी काँग्रेसचे ज्येष्ठ नेते आणि विरोधी पक्षनेते अजित पवार, खासदार सुनिल तटकरे, माजी मंत्री छगन भुजबळ, माजी मंत्री दिलीप वळसे पाटील यांनी केले.

या बैठकीला राष्ट्रवादीचे ज्येष्ठ नेते खासदार प्रफुल पटेल, प्रदेशाध्यक्ष जयंत पाटील, खासदार सुप्रिया सुळे आदी उपस्थित होते असेही महेश तपासे यांनी सांगितले.

Photo of सुधीर जगदाळे सुधीर जगदाळे Send an email May 25, 2023
Photo of सुधीर जगदाळे

सुधीर जगदाळे

Back to top button
error: Content is protected !!